Plattdüütsch

Alle twee Johr gifft dat vun de Heimatbund in´t hele Land „Schölers leest Platt“; denn: Plattdüütsch is wedder wat, is een Spraak, in de man allens seggen kann (mennigmol beter as op hochdüütsch), in de ok schreven, sungen und Theoter speelt warrt.
In veele Familien schnacken Öllern un Grootöllern ünnernanner Platt un darvun kümmt dat, dat Kinner wat opschnappen un mit de Tied so sinnig rinwassen in de bi uns offiziell tolatene Spraak. För all disse Schölers un de, de dat vun de Pieke an lern wöllen, hebben wi in uns´ School een Plattdüütsch-Kurs bi Fru Peters inricht.
Kollegin Peters weer dat ok, de vör de hele School de Wettbewerb in´t Lesen organiseert hett. Darto hebben sick de Besten ut de enkelten Klassen drapen. Se hebben Geschichten leest vör een Jury vun Lehrern, de sülm Platt schnacken un hören kunnen, wat dat wull richdig „platt“ klung.

Darbi is rutkamen, dat Torge Mordhorst mit Afstand de beste Plattleser vun de Johrgänge 8. bit 10. Klass is, un vun´t föffte bit söbente Schooljohr hett Bjarne Börensen (op unse Foto links) wunnen. Wat ´n Tofall is: Beide Schölers wahnen op Stolkerfeld, wo in´n Masse Hüüser Platt lebennig is.
Nah Wiehnachten krieg´n se Bescheed, wodennig dat wiedergeiht mit de Wettbewerb. Denn möten se gegen de Siegers vun anner Schoolen antreden, un wenn se dar wedder god lesen, denn warrn wi ju dat wiss an disse Sted vertellen.

Sz